Дэлхийн банктай хамтран хэрэгжүүлж буй “Төсөв, Санхүүгийн тогтвортой байдлыг бэхжүүлэх төсөл”-ийн хүрээнд Сангийн яам, Санхүүгийн Зохицуулах Хороо/СЗХ/, Монголын Даатгалын Холбоотой хамтран Даатгалын тухай хууль, Даатгалын зуучлалын тухай хууль болон Жолоочийн даатгалын тухай хуулиудын шинэчилсэн найруулгын төслийг УИХ болон ЗГ-ын холбогдох бодлого, төлөвлөлтөд заагдсаны дагуу Даатгалын салбарын эрх зүйн шинэчлэлтийг үе шаттайгаар хэрэгжүүлэх зорилтын хүрээнд хамтарсан ажлын хэсгээс бэлтгэсэн хуулийн төслийг  2022 оны 06 дугаар сард Сангийн яамны цахим хуудсанд байршуулснаар олон нийтийн хэлэлцүүлгийг цахим хэлбэрээр явуулж мэргэжлийн холбоод, салбарын оролцогчид, хувь хүмүүсээс ирүүлсэн 277 саналыг тухайн хуулиуд болон дагалдах хуулийн төслүүдэд тусган дараагийн шатны хэлэлцүүлгүүдэд бэлтгэн боловсруулсан.

          Ингээд 2022.08.17,18,19-ны өдрүүдэд Санхүүгийн зохицуулах хороо/СЗХ/-ны хуулийн төслийн ажлын хэсэг, Монголын Даатгалын Холбоо хамтарсан вакум уулзалтыг СЗХ-ны байранд 3 өдөр хийсэн. Цар тахлын үеийн дараахан Төрийн хэмнэлтийн хууль гарснаар төр, түүний бүх шатны байгууллага, нийтийн алба, тэдгээрийн үйл ажиллагаанд санхүүгийн сахилга батыг мөрдүүлж, ил тод байдлыг хангах, үр ашгийг нэмэгдүүлэх, үрэлгэн байдлыг хязгаарлах, хяналт тавихтай холбогдон гарсантай холбоотойгоор  байгаль орчинд ээлтэйгээр гарын авлага, тараах материал хэрэглэлгүй тэг зарлагатай багц хуулийн төсөл,  мэдээллүүд 100% дижитал хэлбэрээр явагдсан. Ингэснээр Сангийн яам болон бусад харьяа байгууллагуудаа уриалан байгаль орчиндоо ээлтэйгээр ямар ч хог хаягдалгүй төсөв мөнгө зарцуулахгүйгээр аливаа олон нийтийн хэлэлцүүлгийг хийж болдог сайн жишгийг гаргаж бусдыгаа уриалсан хэлэлцүүлгийг хэд хэдэн  удаа амжилттай зохион байгуулсан.

Уг уулзалтаар гарсан саналуудын үндэслэл, судалгаа тооцоотой танилцаж, Даатгалын тухай хуулийн шинэчилсэн найруулгын төсөл дээр ирүүлсэн 50 санал, Даатгалын зуучлалын тухай хуулийн төсөл дээр ирүүлсэн 13 санал, Жолоочийн даатгалын тухай хуулийн төсөлд ирүүлсэн 10 санал дээр харилцан ойлголцож нэгдсэн саналд хүрэв. Монголын Даатгалын Холбоог төлөөлж Монгол Даатгал ХХК-ийн хуульч А.Анармаа, Бодь Даатгал ХХК-ийн хуульч Ж.Даваасүрэн, О.Гэрэлмаа, Монре Даатгал ХХК-ийн хуульч Г.Ану-Үжин, Тэнгэр Даатгал ХХК-ийн хуульч С.Маралмаа болон Монголын Даатгалын Холбооны Гүйцэтгэх захирал Ж.Батжаргал нар оролцсон бол Санхүүгийн Зохицуулах Хороог төлөөлж Даатгалын газрын дарга З.Батболд, ахлах референт П.Цэрэндэжид, референт Э.Сайнзаяа, мэргэжилтэн О.Бямбасүрэн, референт Ц.Долгорсүрэн, референт Н.Батцэцэг, ахлах мэргэжилтэн П.Мөнхсайхан, референт Н.Дуламсүрэн, Хууль эрх зүйн хэлтсийн ахлах мэргэжилтэн Б.Ням-Очир болон Сангийн яамыг төлөөлж СЗЗД хэлтсийн ахлах мэргэжилтэн Н.Түвшинжаргал, Төслийн зөвлөх Б.Жавхланцогт нарын төлөөлөлтэйгөөр хэлэлцүүлгийг хийсэн.

Даатгалын багц хуулиудын шинэчилсэн найруулгын төсөлд холбогдох саналуудыг тусгаснаар даатгалын ангиллын зааг ялгааг тодорхой болгох, ангиллын нэршлийг хэрэглэгчдэд илүү ойлгомжтойгоор томьёолох, даатгалын салбарын оролцогчдод цахим дэвшилтэт техник технологид суурилсан даатгалын үйлчилгээ үзүүлэх боломжийг бүрдүүлж, хөгжүүлэх эрх зүйн орчныг бий болгох, амьдралын даатгалыг хөгжүүлэх, заавал даатгалын нэгдсэн тогтолцоог бий болгох, технологид суурилсан даатгалын бүтээгдэхүүн үйлчилгээг дэмжих, мэргэжлийн хөрөнгө оруулагч даатгагчдыг бий болгох, эрсдэлийн удирдлагын оновчтой тогтолцоог боловсронгуй болгох, даатгуулагчдын эрх ашгийг хамгаалах эрх зүйн орчин сайжрах зэрэг ач холбогдолтой болох юм. Мөн Даатгалын тухай хуулийн шинэчилсэн найруулгын төсөлд эрсдэлийн удирдлагын тогтолцоог сайжруулах зорилгын хүрээнд давхар даатгалын үйл ажиллагааны тогтолцоог боловсронгуй болгох, дотоодын даатгагч нарын чадавхыг нэмэгдүүлэх, гадагш урсах валютын урсгалыг бууруулах зорилгоор давхар даатгалын тодорхой хувийг дотоодын давхар даатгагчид даатгуулах зохицуулалтыг тусгах, даатгалын үйл ажиллагаанд цахим болон дэвшилтэт техник технологийг  ашиглах боломжийг бүрдүүлж, хөгжүүлэх, эрх зүйн орчныг бий болголоо.

Жолоочийн даатгалын тухай хуулийг шинэчлэн найруулснаар уг даатгалын чанар, үйлчилгээ сайжрах, даатгалын хураамж, үнэлгээ нь олон улсын жишигт нийцсэн, бодит үнэлэмжээр тогтох, төрийн оролцоо багасах, даатгалын тохиолдол гарсан нөхцөлд түргэн шуурхай шалган хохирлыг үнэлэх, богино хугацаанд нөхөн төлбөр олгох, зам тээврийн ослын  аливаа тохиолдолд хохирогчийн эрх ашиг хамгаалагдах юм.

Жолоочийн даатгалын сан нь зөвхөн даатгагч нөхөн төлбөр олгохгүй байхаар хуульд заасан нөхцөлийн улмаас хохирогчид даатгалын нөхөн төлбөр олгох үйл ажиллагааг хамааруулсан байсан бол энэхүү үйл ажиллагааг даатгагч нар өөрсдөө хариуцан хийснээр хохирогч даатгалтай болон даатгалгүй аль ч тохиолдолд даатгалын нөхөн төлбөр авах боломжийг бүрдүүлж, улмаар даатгалын салбарын нэр хүнд өсөх, даатгагч нар энэхүү зохион байгуулалтын бүтцийнхээ хүрээнд шуурхай албыг шийдвэрлэх давуу талыг бий болгож өгсөн зэрэг олон давуу талуудыг энэхүү багц хуульд шингээж Улсын их хуралд өргөн барихаар зэхэж байна.